Fanafihan-jiolahy tany Mahajanga – Nandamoaka ny fikasana
Taorian’ny velam-pandrika nataon’ny mpitandro filaminana an’ireo andian-jiolahy nikasa hanafika tany Mahajanga dia noraisim-potsiny izy ireo. Ny sabotsy alina teo no fantatra fa saika hiverina handroba teratany frantsay, tao Andovinjo izy ireo. Ny 3 febroary teo no efa nikasa hanao fanafihana tao amin’izany vazaha izany saingy nandamoaka satria nisy mpiambina ilay tanàna. Fanomezam-baovao avy amin’ny olona tsara sitra-po avy eo no nahafahana nisambotra ny iray tamin’ireo jiolahy. Ity farany izay voalaza fa mpitari-dalana ary tamin’ny fanadihadiana natao taminy koa no nahazoana fanampim-baovao mahakasika ireo namany. Nisy noho izany ny velam-pandrika nataon’ny mpitandro filaminana, ka tao amin’ny trano fisakafoanana iray teny amin’ny Jirama Amboaboaka no nosamborana ireo mpanafika miisa 4, tamin’ny andro saika hanafihana. Sarona niaraka tamin’izy ireo ny basy poleta 9mm roa miaraka amin’ny bala. Araka ny loharanom-baovao voaray dia andian-jiolahy avy aty an-drenivohitra ireo mpangalatra ireo ka ny 30 janoary teo izy ireo no nigadona tany Mahajanga. Mbola karohina kosa ny naman’izy ireo hafa.
L.N