Toamasina – Fatim-behivavy notetehana natsipy eran’ny tanàna
Tranga iray tena nampihoron-koditra tanteraka no niseho teny amin’ny fokontany Salazamay, any Toamasina, omaly maraina. Fatim-behivavy 26 taona izay novonoina tamin’ny fomba feno habibiana no hitan’ny fokonolona, tokony ho tamin’ny 5 ora tany ho any, manakaiky ny fiangonana Fjkm. Notetehana tanteraka ny vatan’ilay vehivavy manontolo ary naparitaka eran’ny tanàna. Nesorina ihany koa ny voamasony sy ny lelany. Nidina teny an-toerana, rehefa avy nampandrenesina, ny tompon’andraikitra avy ao amin’ny Bmh nijery ifotony sy nanangona ireo ratsam-batana mialohan’ny nitondrana ny razana teny amin’ny tranom-patin’ny hopitaly Be. Tamin’ny fizahana natao dia fantatra fa natao tanaty vata fampangatsiahana ny razana vao nariana.
Miaina ao anaty tebiteby sy tahotra tanteraka ny mponin’i Toamasina manoloana ity tranga mampalahelo ity. Mizara roa ihany koa ny fanontanian’ireo fokonolona hoe: vono olona tsotra sa halatra taova ity niseho ity?