Voasambotra ireo dimy lahy tompon’antoka tamin’ny fanafihana ny « salle de jeux », ny alahady alina, tokony ho tamin’ny 11 ora. Nidina teny an-toerana avy hatrany mantsy ny mpitandro filaminana raha vao naharay antso ka mbola tratra teny ireo olon-dratsy. Vao nahatazana ny fahatongavan’ireto voalohany anefa ireo jiolahy dia vaky nandositra nihanika tamboho ka voatery nitifitra ny polisy izay nahavoa ny iray tamin’ireo olon-dratsy. Naratra mafy teo amin’ny sandriny dia noraisim-potsiny izy io. Ity farany kosa avy eo no nanondro ireo namany ary tsy niandry ela ireo polisy fa nanaraka ireo jiolahy tafaporitsaka ka voasambotra tao an-tranony  indray i Kapila izay atidoha nikotroka ny fanafihana ary tratra niaraka taminy ihany koa ireo entana vao avy nangalarina toy ny « ampli », « décodeur », « baffle » miisa roa sy ny vata-fahitalavitra « écran plat » ary « jeux PlayStation PSII ». Tamin’ny fakana am-bavany azy indray no nahafahana nisambotra ny namana telo hafa dia tsy iza fa i Rasta sy Razaka ary Rabetsy. Ity farany izay tafatsoaka teny am-baravarankely tamin’ny fisamborana azy ireo ny alatsinainy lasa teo iny. Ny ampitson’iny ihany anefa dia naterin’ny havany teny amin’ny kaomisaria i Rabetsy. Efa mpamerin-keloka avokoa izy ireo, raha ny tatitra avy amin’ny polisy. Natalotra ny fampanoavana omaly ny efa-dahy raha toa ka mbola manaraka fitsaboana eny amin’ny hopitaly ilay naratra voatifitra.

Laurena Nany