Mbola voatory ihany ny raim-pianakaviana iray izay nindaosin’ny fahafatesana ny zoma 5 febroary lasa teo, tany Mahajanga, vokatry ny lozam-pifamoivoizana nihatra taminy. Araka ny loharanom-baovao avy an-toerana dia nodomina teratany frantsay iray nitondra « Quad » ny lehilahy iray nitondra môtô ny androtr’io, teny akaikin’ny lisea Philibert Tsiranana. Mafy ny fifandonana ka nipitika lavidavitra nisian’ny loza izy io. Vokany, naratra mafy ka nifamonjena haingana nentina teny amin’ny hopitaly. Tamin’izay fotoana izay anefa dia nanome vola 400 000 ariary  ilay vazaha mba hitsaboana ny naratra saingy namoy ny ainy ilay lehilahy  andro vitsivitsy taorian’ilay loza.

Tsy nijanona teo fa nitory ilay vazaha nandona  ilay raim-pianakaviana namoy ny ainy ary afaka madiodio teo anatrehan’ny Fitsarana iry voalohany, ny 17 febroary lasa teo fa ilay lehilahy nitondra môtô kosa voampanga ho tsy nanao aroloha. Tena nahagaga ny fianakavian’ny maty izany satria raha ny fanazavan’ny renin’ilay niharan-doza dia nasain’ny polisy nentina nody ilay aroloha rehefa vita ny fizahana ny razana tamin’ny fotoana nitrangan’ny loza fa hoe efa betsaka loatra ny aroloha voatazona ao amin’ny biraon’ny polisy. Nilaza ny hampiakatra ny raharaha ny havan’ny maty.” Sanatria ve ho matimaty foana ny havanay”, hoy izy ireo.

L.N