Mpamaky trano gaigilahy efa ikoizan’ny mponina any Toamasina i « Zorro » ary vao tsy ela dia saron’ny mpitandro filaminana ambodiomby avy namaky trano tao Ambohijafy. Tamin’izay fotoana izay dia mbola sarona tao anaty môtô nentiny  ireo entana halatra vao nangalariny. Taorian’ny fanadihadiana nataon’ny mpitandro filaminana taminy dia niakatra fitsarana ny raharaha ary nahazo fahafahana vonjimaika i « Zorro » fa hoe tsy ampy ny porofo iampangana azy.

Ketraka sy valalanina manoloana ity fanapahan-kevitra noraisin’ny mpitsara ity ireo olona nanaraka akaiky ity raharaha. « Fa miandry porofo tahaka ny ahoana ireo mpitsara vao ho gadraina ilay olon-dratsy. Efa manao ny asany ihany ny mpitandro filaminana fa ny ao amin’ny Fitsarana mihitsy no misy mpitsara matim-bola ka na efa tratra ambodiomby izao dia mbola omena fahafahana vonjimaika ihany. Efa hita mandehandeha aty Toamasina mitady izay arapany indray izao ingahy” Zorro”. Ny fanapahan-kevitra tahaka izao ihany no tsy ananan’ny olona fahatokisana amin’ny Fitsarana intsony ka mampirongatra ny fitsaram-bahoaka », hoy ny loharanom-baovao iray avy any an-toerana, niresaka anay an-telefaonina.

Laurena Nany