Mahazo vahana ny fidorohana zava-mahadomelina any Toamasina amin’izao fotoana izao ary ireo ankizy tsy ampy taona no voalaza fa tena mirona amin’ny fifohana izany. Telo lahy vao erotrerony no nosamborin’ny polisim-pirenena any an-toerana teo am-pifohana rongony tamin’iny herinandro iny, tany Andranomadio. Araka ny loharanom-baovao dia 14 taona monja izy ireo ary mpianatra ny Ceg iray any an-toerana. Nandritra ny famotorana azy ireo indray no nahafahana nisambotra ilay mpamatsy rongony, izay monina ao amin’ny fokontany Ankirihiry avaratra, vakim-paritra 11/58. Mbola sarona tao an-tranony ny fonosona rongony milanja 4kg, izay mifono tsara tao anaty harona plastika.

Raha ny angom-baovao voaray dia ireo mpianatra ny Ceg iray any an-toerana no tena mpidoroka ity zava-mahadomelina ity ary isaky ny handeha hilalao baolina kitra sy isaky ny alarobia sy sabotsy amin’ny fotoana tsy hianarana izy ireo no tonga mividy izany ao an-tranon’ilay mpamatsy. Fantatra hatrany fa ny vola atao solon-tsakafo omen’ny ray aman-dreniny azy ireo no hividianana rongony .

Laurena Nany