Tao anatin’ny andro iraisam-pirenena ho an’ny tenin-dreny, ny 21 febroary 2016, no nanamafisan’ny solombavambahoaka sady mpikabary  Naivo Raholdina, fa ny tenin-dreny no mora ampitàna haingana ny hafatra ho an’ny fampianarana.  Io no tena mandrafitra ny kabary amin’ny foko valo ambinifolo eto Madagasikara ka izay no anisan’ny nananganana ny FIarahan’ny MPIkabary eto amin’ny Boriboritany faha Dimy na ny Fi.Mpi.Dimy,  izay sampana kolontsaina iray ao anatin’ny fikambanana Fafi V.

« Kabary – Asa – Vokatra » no teny filamatra nentina nanokafana ofisialy ny Fi.Mpi.Dimy izay manambara sahady ny firaisan-kina ary ny  fiarahan’ny mpikabary eny amin’ny boriboritany faha dimy. Tamin’ny famelabelarana sy ny fampahafantarana ny fikambanana no nanambaran’ny solombavambahoaka fa  ny foibe toerana dia eny  amin’ny trano fandraisam-bahoaka  Ambohidahy Ankadindramamy, ary hisy ny fitetezana ny  fokontany 27 ho fampahafantarana izany. Nanambara ihany koa ny tenany fa isan’ny tanjon’ny Fi.Mpi.Dimy ny  mba iainan’ny isan-tokantrano manerana  an’i Madagasikara ny kabary, ary miainga any amin’ny ankohonana mipaka any amin’ny fianakaviana.

Nomarihiny fa tsy misy ny latsakemboka fa ezaka kosa hampiroborobo an’io kolontsaina io no angatahana amin’ny tsirairay avy amin’ny fisian’ny fifaninanana sy ny don-tandroka sy tapo-tandroka, ny fihavanana kabary ary ny hatsikana kabary sy izay traikefa hananan’ny tsirairay  mba ahafahana mifehy tanteraka sy analana ny tahotra ary henatra eo anatrehan’ny fikabariana.

Mia