Nahery vaika ny loza voajanahary tany amin’ny distrikan’i Fandriana. Trano sy foto-drafitr’asa  maro no potika vokatry ny tafiodrivotra sy ny varatra tany an-toerana, ny alatsinainy hariva teo. Nanimba zavatra maro tsy nisy ohatr’izany ny tafiodrivotra ary nifofofofo be tokoa ka trano am-polony any ho any no indray niendaka ny tafony. Nandritra izay fotoana izay ihany koa no nirefotra mafy ny varatra ka tokantrano iray tany an-toerana no nidirany. Vehivavy iray no voa mafy. Nianjera mafy  sy tsy nahetsika nandritra ny fotoana lava vokatr’izany ilay ramatoa ary nentina haingana namonjy ny toeram-pitsaboana avy eo. Tsy misy ahiana kosa ny ainy.