Saron’ny polisy miady amin’ny fidorohana zava-mahadomelina eny Anosy, teny Isotry, ny talata vao mangiran-dratsy, tokony tamin’ny 4ora tany ho any, ny fiara iray nitondra toaka gasy. Teo am-panidinana ireo toaka gasy 1 200 litatra nafatratra tao anaty bidao amin’ny 20 litatra miisa 60 indrindra ny lehilahy miisa 3 ka ny roa mpamily no tra-tehaky ny mpitandro filaminana. Tamin’ny fanadihadiana azy telo lahy no nahalalana fa avy tany amin’ny fokontany Tanambao  kaominina Fanandrahana, any Toamasina ity toaka gasy ity ka ny alatsinainy hariva lasa teo, tamin’ny 5ora no niainga tany izay aparitaka eto an-drenivohitra ary izany Lesera izany no tompony. Vidiana 1000 ariary ny litatra ary amidy 1 900 ariary ka 5 000 ariary no voalaza no sarany nitondrana ny iray bidao miakatra aty. Ataon’izy ireo ao ambany entana plastika ireo toaka gasy ireo mba tsy ahitan’ny polisy sy zandary manao fizahana eny an-dalana eny. Natolotra ny fampanoavana, omaly ireo olon-dratsy. Efa mandeha ny fikarohana ny tompon’ny entana.

Laurena Nany