Lehilahy mpangalatra iray no naratra mafy niharan’ny fitsaram-bahoaka, tany amin’ny kaominina sady distrikan’i Morombe, ny harivan’ny talata lasa teo. Tratra nanao sinto-mahery ny finday-n’olona iray tena amin’ny lalana izy ka niantso vonjy ilay lasibatra. Nifanenjehan’ny fokonolona izy io ka tsy lasa lavitra dia tratra. Nofatoran’izy ireo avy eo ny tongony sy ny tanany ka notsarain’ny fokonolona avy hatrany. Nodarohana sy novonina ary tsy nananan’ ireo olona antra mihitsy ilay olon-dratsy avy eo ka ny fahatongavan’ny mpitandro filaminana naka azy teo an-tanan’ireto vahoaka tezitra no nahavonjy azy fa raha tsy izany angamba dia efa maty.

Nentina notsaboina haingana teny amin’ny hopitaly iray tany an-toerana ilay jiolahy mialohan’ny nanaovana fanadihadiana azy, omaly maraina, teny amin’ny biraon’ny mpitandro filaminana. Amin’ity herinandro ity no hiakatra Fitsarana ny raharaha ka mandra-piandry izany dia notanana ao amin’ny biraon’ny polisy ilay olon-dratsy.

Laurena Nany