Efa manana fomba maro isan-karazany ireo mpanao ratsy mba amelezana ny lasibatra. Tovolahy iray nitondra môtô izao no saika namoy ny ainy rehefa nofitahin’ny vehivavy mitaiza kely teny Ankadimbahoaka, tapa-bolana lasa izay. Araka ny loharanom-baovao dia teo amin’ny lalana fiodonan’ny fiara teny an-toerana no nitranga izany, tokony tamin’ny 11ora alina tany ho any. Nandeha kodiaran-droa ny tovolahy iray no nahita vehivavy mitaiza kely sady nitomany teo amoron-dalana ka nijanona avy hatrany. Rehefa nanontaniana ny antony nampitomany azy ilay ramatoa dia nilaza fa novonoin’ny vadiny sady noroasiny ka nanapa-kevitra handeha hody any an-tanindrazana ary miandry fiara karetsaka ho eny amin’ny Fasan’ny karana izy mianaka. Nangoraka azy ilay lehilahy ka niverin-dalana nanatitra azy teny amin’ny fiantsonan’ny fiara.

Vao tonga teo amin’ny vavahadin’ny fiantsonan’ny fiara anefa izy ireo dia efa nisy roalahy nitazona « bois rond » niandry teo ka vantany vao niala ny kodiaran-droa ilay ramatoa sy ny zanany dia novelesin’ireo jiolahy ilay tovolahy. Vokany, torana tsy nahatsiaro tena izy io ary nobatain’izy ireo ka natsipiny teny amin’ny ranon’Ikopa ary lasan’izy ireo kosa ilay môtô. « Noheverin’ireo olon-dratsy fa maty angamba ilay namanay ka narian’izy ireo teny amin’ny ranon’Ikopa. Tsara vitana fa nihantona tamin’ny hazo izy ka tsy lasan’ny rano ary nisy nahita ary nentin’ny olona teny amin’ny hopitaly », hoy ny loharanom-baovao akaiky ny lasibatra.

L.N