Tovovavy iray, 26 taona eo ho eo, no nosamborin’ny polisy miady amin’ny zava-mahadomelina, teo am-pivarotana toaka gasy. Tao amin’ny trano fonenany ny ny talata teo, tokony tamin’ny 1ora sy sasany  no tra-tehaka izy. Mbola tratra tao an-tranony ny toaka gasy 73 litatra, nandritra ny fisavana izany. Nentina avy hatrany tany amin’ny biraon’ny polisy teny Anosy io vehivavy io natao famotorana ka tamin’izany no nilazany tamin’ny mpitandro filaminana fa 3 400 ariary ny ivarotany ny litatra raha alaina 2 800 ariary izany ka telo litatra isan’andro no lafony ary isan-kerinandro izy manafatra entana. Tsy fantatra kosa ny toerana hanafarana izany toaka gasy izany. Mbola nandritra ny fakana am-bavany azy no nilazany fa teo amin’ny roa volana teo no nanaovany ity asa fivarotana toaka gasy ity na dia fantany tsara aza fa voararan’ny lalàna izany. Rehefa notanana roa andro tao amin’ny biraon’ny polisy misahana ny ady amin’ny fidorohana zava-mahadomelina dia natolotra ny fampanoavana omaly ny raharaha.