Miisa 397 ireo mpianatra andiany faha-enina misalotra ny anarana « Ilo », nivoaka tamin’ny fomba ofisialy, omaly teny amin’ny lapan’ny Fanatanjahantena Mahamasina. Avy amin’ny oniversite Aceem ireto mpianatra ireto. Mahatratra 340 ireo nianatra nandritra ny telo taona ary notolorana ny diplaoma « Licence ». Nianatra nandritra ny efatra taona kosa ny 57 ka nahazo ny diplaoma « Master ». Avy amin’ny lalam-piofanana « Sciences de la santé, Informatique électronique, Communication, Gestion, Droit privé et public, Droit et Sciences politiques » ireo mpianatra ireo.

Tsy mijanona hatreo ny fampanaraham-penitra ny tontolony fampianarana ao amin’ny oniversite Aceem ka nampahafantarana omaly ny fisian’ny lalam-piofanana vaovao dia ny « Economie et développement », izay ahafahana mampifandray ny fiofanana amin’ny zavatra ilain’ny firenena ho fampandrosoana an’i Madagasikara. Nambaran’ny filoha mpanorina ny vondrom-panabeazana Aceem fa 70 isan-jaton’ny mpianatra mivoaka ao amin’ity oniversite ity dia mahita asa avokoa noho ny fifandraisana amin’ny orinasa sy asam-panjakana amin’ny fiofanana izay omen’ny sekoly.  Androany ny fisantarana ny fankalazana ny faha-30 taona nijoroan’ny vondrom-panabeazana Aceem.

Laurena Nany