Mpanao Dvd piraty iray no nosamborin’ny polisy, teny Andranomanalina, ny alarobia lasa teo, tokony tamin’ny 11ora atoandro tany ho any, nandritra ny fisafoana natao teny an-toerana. Nahita lehilahy mitondra sakaosy mavesatra be no sady mampiahiahy ny fihetsiny ny mpitandro filaminana ka niroso avy hatrany tamin’ny fanakanana azy ary nisava izany sakaosy izany. Tra-tehaka nandritra izany ireo Dvd mbola tsy niasa miisa 500 sy « jaquette » Safelika saison 15 maro be. Marihina fa mbola vao hivoaka adiny roa alohan’ny nahitana ireo Dvd ireo ity horonan-tsary ity. Tamin’ny famotorana azy indray no nahafahana nisambotra ny namany iray hafa teny Itaosy. Ity farany izay tra-tehaka ny polisy teo am-panaovana « duplicata » tao an-tranony. Mbola sarona niaraka taminy ny Dvd mbola tsy nias amaro be, « jaquette » gasy sy vahiny maro be, « lecteur » be dia be, « duplicateur » miisa 2 izay mahavita manao piraty miisa 300 isan’andro, « coupe papier » ary solosaina iray. Vao nampandrenesina ny zava-misy dia tonga nametraka fitoriana ny mpanatontosa horonantsary « Scoop Digital ». Atolotra ny Fitsarana androany zoma 26 febroary izy roalahy.

L.N