Niampatrampatra teny afovoan-dalana ny faty olona, tany amin’ny distrikan’i Fort- Dauphin, ny sabotsy lasa teo, vokatry ny fifandonana mahery vaika teo amin’ny kodiaran-droa miisa roa. Tao amin’ny toerana antsoina hoe Soanierana, fokontany Ambatoavy ravina, kaominina Soanierana no nitrangan’izany, tokony tamin’ny 5ora hariva tany ho any. Araka ny tatitra avy amin’ny zandary dia kaporaly misotro ronono ny iray tamin’ireo namoy ny ainy. Ity farany izay avy namonjy fivavahana nanao taingin-droa no nifandona mafy tamin’ny môtô iray nifanena taminy. Ny fandehanan’ity farany mafy niaro hamamoana no antony nahatonga ny loza. Nahenoana fofona alikaolo mantsy izy io nandritra ny fizahana nataon’ny mpitandro filaminana tany an-toerana. Vokany, maty tsy tra-drano ireo mpamily roa raha toa ka naratra mafy ilay mpandeha tao aorian’ilay kaporaly. Nentina namonjy hopitaly avy hatrany ny naratra ary efa manaraka fitsaboana amin’izao fotoana izao. Tsy misy ahiana ihany koa ny aminy. Ireo namoy ny ainy kosa efa natolotra ny fianakaviany tsirairay avy taorian’ny fizahana natao.

Laurena Nany