Raikitra ny sakoroka teo amin’ireo samy mpanendaka teny Ambodin’Isotry, omaly atoandro, tokony tamin’ny 2ora sy sasany tany ho any. Noho ny fitiavan-tenan’ ny iray tamin’izy ireo mantsy dia nifanenjika tamin’ny antsy be avy teny amin’ny 67 ha ka hatrany amin’ny tsenan’Ambodin’Isotry ireo olon-dratsy ireo. Araka ny fahitana ny trangan-javatra teny an-toerana dia efa-dahy izy ireo no mpinamana manao io asa fanendahana io. Avy nanendaka olona iray teny amin’ny tany malalaka anefa ny mpanendaka iray ka tsy nety nizara ny zavatra azony fa notazominy ho azy irery nefa mifampizara ny fifanarahan’izy ireto rehefa mahazo entana ka nahasosotra ireo namany telo hafa.

Tsy fantatra mazava anefa ny entana azon’io mpanendaka io fa tsy nomeny tamin’izany mihitsy ireo namany telo ka raikitra ny fifanenjehana ary naka antsy be-n’ny mpivaro-kena iray teny an-toerana ny iray tamin’ireo olon-dratsy nanenjika ary tratrany tao amin’ny tsenan’Ambodin’Isotry tao ilay ranamana. Raha tsy ireo mpivarotra dia kely foana no tsy namoy ny ainy izy io. Vao hanetika azy mantsy ny iray tamin’ireo namany dia nosintomin’ny mpivarotra iray teo an-tanany ilay antsy ary nilaza hoe «Mandehana eny ivelany eny ianareo raha hifamono fa tsy eto anoloan’ny fivarotako eto. » Niravina ho azy teo avy eo ny raharaha. Ireo mpitandro filaminana teny an-toerana kosa tsy nahatsikaritra na inona na inona fa variana nandamina ny fifamoivoizana.