Hiavaka ny fankalazana ny 8 martsa, andro natokana ho an’ny vehivavy, amin’ity taona 2016 ity ho an’ny eto an-drenivohitra. Hisy ny fanentanana amin’ny homamiadan’ny nono sy fitiliana maimaim-poana ny vozon’ny tranon-jaza mandritra ny tontolo andro ny 8 martsa, eny amin’ny hopitaly Hjra. Hetsika izay karakarain’ny Jci Ilan’Iarivo ary novatsian’ny « fondation BOA » vola mitentina 26 tapitrisa ariary.

Vehivavy 1 500 hatramin’ny 1 800 isa isan-taona no tratran’ny tranga vaovao eto Madagasikara ka ny 30 isan-jaton’ireo dia homamiadan’ny nono ary 25 hatramin’ny 29 isan-jato homamiadan’ny vozon’ny tranon-jaza. Ankoatra ny fitiliana maimaim-poana ity farany dia hisy ihany koa ny toro-hevitra mba hahafataran’ny vehivavy fa misy zavatra ao anaty nono satria be dia be ireo voa nefa vitsy no manantona toeram-pitsaboana, noho ny fahalafosan’ny saran’ izany, izay mahatratra hatrany amin’ny 90 000 ariary ny « mammographie ».

Marihina fa vehivavy 20 taona hatramin’ny 50 taona miisa 300 efa mirona amin’ny firaisana ara-nofo no horaisina amin’io fotoana io. Ho an’izay liana, efa manomboka ny fisoratana anarana eny amin’ny « Centre franco-malgache », eny Anosy.