Nandravarava indray ireo dahalo tany amin’ny distrakan’Ankazoabo Atsimo, ny alin’ny 3 mars hifoha 4 marsa lasa teo. Efa-dahy izy ireo no nirongo basim-borona izay voalaza fa nanafika  ny tranon’ny mpivarotra iray, mipetraka ao amin’ny fokontany Ambohitsoa any an-toerana. Nirefodrefotra ny poa-basy nandritra ny fanafihana ary horohoro tanteraka ny an’ireo lasibatra satria naharitra fotoana maromaro no nijanonan’ireo mpandroba tao an-toerana. Ankoatra ny fandrahonana dia nisy ihany koa ny fikasihan-tanana nihatra tamin’ireo lasibatra mba hamoaka vola. Vokatr’ izany, olona roa no naratra. Tsy niala ihany koa ireo olon-dratsy raha tsy nahazo ny lelavola izay mitentina 2,5 tapitrisa ariary, valisy iray, finday iray ary « Lecteurs Cd » miisa 3. Efa eo am-pelatanan’ny mpitandro filaminana ny raharaha.