Tontosa omaly teny amin’ny sekoly ambonin’ny polisim-pirenena, eny Ivato, ny fametrahana ambany faneva ireo mpianatra ho kaomisera sy « officier de police », misalotra ny anarana andiany Mahery, rehefa nahavita ny fiofanana fototra na ny « Formation commune de base ». Roapolo ireo nisafidy ny ho kaomisera ka vehivavy ny roa ; vehivavy ihany koa ny dimy amin’ireo telopolo nianatra momba ny « officier ». Nankahery azy ireo ny Minisitry ny Filaminam-bahoaka, ny Inpektora jeneralin’ny polisy Randimbisoa Blaise Richard manoloana ny andraikitra miandry ny polisim-pirenena amin’ny fanantanterahana ny asany dia ny fitandroana ny filaminana izay anisan’ny vaindohan-draharahan’ ny polisy izay mahakasika ny fanakaikezana ny vahoaka. « Mila voafehy ny zavatra atao amin’ny fanarahana antsakany sy andavany ny fampianarana omen’ireo mpanabe sy ireo lehibe am-perin’asa mba hahafantarana ny pitsopitson’ny asa izay antoky ny fandrosoan’ny firenena. Ny hery tsy mahaleo ny fanahy ka anisan’izany ny toe-tsaina sy ny soatoavin’ny polisim-pirenena izay mitaky toetra sy andraikitra maro mamaritra ny fanahy  maha olona eo anivon’ny polisim-pirenena », hoy ny Minisitra nandritra ny lahateniny. Nisy ihany koa ny fampatsiahivana ireo vina napetraka dia ny fiadiana amin’ny kolikoly amin’ny endriny rehetra, ny fanarahana ny fitsipi-pifehezana ary ny fiadiana sy famongorana ny asan-jiolahy.