Tovolahy iray sahabo ho 20 taona eo ho eo no maty an-drano, teny amin’ny By-pass, manoloana ny fiodinan’ny fiara, eny Ambohimanambola, ny sabotsy lasa teo. Andian-jatovo maromaro izy ireo no niaraka ary nilaza fa nafana ka lasa niroboka teny anaty rano  nilomano. Tampoka anefa tsy nivoaka intsony izy rehefa samy variana nilalao rano nanao ankisitrika. Nikoropaka ireo niaraka taminy nitady azy fa tsy hita izay nanjavonany. Niantso vonjy tamin’ny manodidina ireo niaraka taminy avy eo ka nifanome tanana nikaroka azy ireo vatan-dehilahy maromaro teo an-toerana. Naharitra fahefan-kadiny ny fikarohana vao hita izy ary nampiakarina teny amoron-drano.

Mbola niezaka namelona azy, ireo olona rehefa tafakatra izy nefa indrisy fa tsy tana intsony ny ainy. Avy any Antanifotsy distrakan’Antsirabe ny fiavian’ity namoy ny ainy ity. Nentina nihazo izany toerana izany ny razana omaly.