Tonga nametraka fitarainana teny amin’ny zandary Arivonimamo, ny lehilahy iray mpamatsy mananasy ny sabotsy 12 martsa lasa teo.  Voaroba vola 5, 5 tapitrisa ariary izy, teny amin’ny toerana atao hoe Soalanitra, kaominina Ambohitrambo, ny zoma 11 martsa. Nisy 3 lahy nanambana basy azy sy nitaritarika azy tany amin’ny takotakona araka ny filazany. Tsy afa-namaly izy nandritra io ka lasa ny vola ary vaky nandositra ireo olon-dratsy nony avy eo. Nidina teny amin’ny toerana nisehoan’ny asa ratsy ireo mpitandro filaminana nijery ifotony ny fandehan-javatra ary nanao ny fanarahan-dia avy eo. Loharanom-baovao avy amin’ny olona tsara sitra-po no nanoro ny lalan’ireo jiolahy ary nahafantarana ny toerana nitsoahan’izy ireo. Tratra ny iray tamin’izy ireo. Nahafahana nisambotra ireo namany roa hafa ny fakana am-bavany azy. Mbola tany amin’izy ireo ny ambim-bola 4, 3 tapitrisa ariary niaraka tamin’ny basy poleta vita gasy iray sy bala roa “9mm”.

L.N