Fananarana – Naratra nodarohan’ilay tovolahy sy ny sipany ny reniny
Renim-pianakaviana iray no naratra mafy rehefa nodarohan’ny zanany lahy sy ny sipan’ity farany. Antony nanaovan’ilay tovolahy izany ny fitenenana mafy azy amin’ny fipetrahany lava ao an-trano, andro vitsy lasa izay, teny Ankadindratombo. Mba nananatra azy amin’ny fidonanam-poana ny reniny, araka ny loharanom-baovao akaiky azy ireo.Tsy tian’ity zanany izany ka niafara tamin’ny fikasihan-tanana ny nahitany masoandro sy ny fisitahany ny trano fonenany ary nifindra tany amin’ny sakaizany teny Alasora izy.
Tsy nijanona teo fa nanita-kevitra ny hangalatra tao amin’ireo nitaiza ilay vehivavy io indray izy roa kely. Nangalarin’izy ireo ny lelavola 6 tapitrisa ariary, ny fahitalavitra fisaka sy ny entana sarobidy maro. Nametraka fitoriana avy hatrany ny lasibatra ary voarohirohy ny mpiandry tanàna. Nandritra ny fanadihadiana ity farany no nilazany fa tompon’antoka tamin’ny fangalarana ireo mpisakaiza ireo. Tsy vao sambana fa efa maromaro ny fianakaviana lasibatr’izy roa ireo araka ny voalaza. Notazomina eny amin’ny zandary izy telo ary mitohy ny famotorana.
L.N