Ambatolampy hatrany Sambava, zaza telo no maty natelin’ny rano. Niseho ny loza voalohany,tany Amboanjobe II, tao amin’ny kaominina Behenjy ny andron’ny talata 15 martsa, tokony ho tamin’ny 1ora atoandro. Navalan’ny rano ny zazalahy iray 11 taona, mpiandry omby raha niampita ny renirano antsoina hoe Andromba, tao Bevovoka. Natao ny fikarohana ka ny ampitson’io 16 martsa vao hita ny vatan’ilay zaza efa tsy misy aina intsony.

Ankizivavy roa samy manodidina eo amin’ny 7 taona eo kosa ireo namoy ny ainy natelin’ny reniranon’i Bemarivo, tany amin’ny kaominina Nosiarina, any Sambava, ny alarobia teo tokony ho tamin’ny 2ora tolak’andro. Zanaka talen-tsekoly tsy miankiana ny iray ; zanaka mpampianatra vao nahazo famindran-toerana avy tany Antsiranana kosa ny faharoa. Saika handeha haka voasary izay manamorona ity renirano ity izy ireo, tamin’io fotoana io. Nanapa-kevitra ny hilalao rano mantsy ireo zazavavy kely ireo talohan’ny hiverenana hody ka rendrika avy eo. Niara-nisalahy nikaroka ireo zaza tamin’ny fampiasana sambo kely haingam-pandeha  ny fokonolona taorian’ny fampandrenesana nataon’ireo fianankaviana teny an-toerana. Hita tany amin’ny 10 kilometatra eo Ambatomenavava, ny zanaky ny talen-tsekoly saingy efa maty. Mbola karohina kosa ny faharoa hatramin’izao.

Laurena Nany