Tsy misy intsony ny fahatahorana an’Andriamanitra fa hatrany am-piangonana avy no tsy ahaizana miaina. Nisy namaky ny fiangonana katolika « Sacré Cœur », ao Tanambao V, any Toamasina, ny alahadin’ny sampankazo teo, tokony tamin’ny 2 ora maraina tany ho any. Saika lasa avokoa ireo fitaovam-piangonana, soa fa tratra ambodiomby ilay tovolahy iray vao erotrerony tompon’antoka tamin’izany. Tsikaritry ny polisy manao fisafoana izy rehefa hivoaka izany tranom-piangonana izany, niaraka tamin’ny « Ampli, table mixeur, synthétiseur, groupe » fampandehanana herinaratra sy fitaovana vitsivitsy. Nentina avy hatrany atao famotorana ilay mpangalatra ary fantatra tamin’izany  fa mpivavaka ao amin’ity fiangonana ity ihany ny tenany.

Mila mailo hatrany ny olom-pirenena mahakasika ny firongatry ny asan-jiolahy mamaivay amin’izao ity fa tsy kely lalana ny mpanao ratsy. Ilaina hatrany ny fiaraha-mientan’ny rehetra mba hahafahana misambotra ireo fanetriben’ny firenena fa olona tena tsy ampoizina mihitsy no mety hahavita hamadika.