Mbola manjaka ny kolikoly eto Madagasikara, indrindra eny anivon’ny fitandroana ny filaminana. Omby manana taratasy ara-dalana, nefa nokasain’ny polisy tsy omena ny tompony, raha tsy manome vola azy ireo. Talanjona ireo tompon’omby tamin’ny fihetsik’ireo mpitandro filaminana manoloana ity trangan-javatra ity. Araka ny loharanom-baovao marim-pototra dia lasan’ny dahalo ny omby miisa 2 tamin’ny tanàna iray, tany ambanivohitra Tsiroanomandidy ny herinandro lasa teo. Nisy ny fanarahan-dia natao rehefa nampandrenesina ny mpitandro filaminana ka tafaverina ihany ireo omby ireo fa kosa najanona tao amin’ny polisy.

Rehefa hanao ny taratasy hitondrana ireo omby kosa ny fokonolona dia nila vaniny ireo polisy ka nasainy nandoa vola efatra hetsy ariary ny tompon’omby raha tsy izany dia azoniny ny fananan’ireto farany. « Gaga ny olona hoe làlana avy aiza izany ? Ny aina efa reraka, ny vola lany natao vatsy. Nefa mitovy amin’ny vidin’ny omby iray io vola angatahana io », hoy hatrany ny loharanom-baovao.

Manoloana izany dia nitaraina teny amin’ireo olom-boafidim-bahoaka tany an-toerana ireo tompon’omby. Ary raha tsy nandray andraikitra ny ben’ny tanàna sy ny solombavambahoaka dia tsy azo mihitsy ny omby.

L .N