Tsy mitsahatra manita-kevitra hanantanterahana ny asa ratsiny ireo jiolahy. Fomba fiasan’izy ireo indray amin’izao ny mampihorohoro ny olona amin’ny alalan’ny bibilava, indrindra ireo mandeha fiara manokana. Fiara mijanona eny amin’ny sisin-dalana sy tavela ao anaty fitohanana no tena lasibatra amin’izany. Jeren’izy ireo tsara ny ao anaty fiara sy karazan’olona mitondra izany dia arakarakara ny ao anaty fiara no hanipazany ny bibiliva. Efa maro ireo tratra teto an-drenivohitra. Vao tamin’ity herinandro ity izao nisy tranga niseho farany teny 67ha. Atsipin’ireo jiolahy avy eo amin’ny varavaram-pitaratra mivoha kely ny bibilava dia mahita izany ny ao anaty fiara, indrindra ireo matahotra ity biby ity dia misahotaka ary misy mihitsy ireo mivoaka ny fiara.

Amin’izay indrindra anefa ireo jiolahy no manararaotra mitsofoka ao anaty maka izay ilainy. Ohatra iray ilay tranga niseho teny amin’ny 67 ha, ka lasa noho izany ny kitapo misy antontan-taratasy, ny « tablette », ny finday sy ny lelavola. « Mila mailo ny olona amin’izao fotoana izao fa tena tsy kely lalana ireo mpanao ratsy. Ary kendreny amin’ny tsy ampoizinao ianao. Lasa avokoa ny ahy ny vola sy ny finday ary antontan-taratasy maromaro. Ny tampoka tsy maha lehilahy e ! », hoy i Théophile, izay lasibatra teny amin’ny 67 ha.

Laurena Nany