Mihatsara tahaka izay hita amin’ny kaominina rehetra ny fandriam-pahalemana eny Ampitatafika. Olana kely ny fahabetsahan’ny mpivarotra rongony, araka ny filazan’ny ben’ny tanàna voafidy teny an-toerana, Rado Ramparaoelina. Mahazo vahana tanteraka ny fidorohana ity zava-mahadomelina ity eny an-toerana, indrindra eny amin’ny fokontany Avaratetezana, izay vao miditra ny tanàn’Ampitatafika ary ireo tanora no tena roboka amin’izany. « Ireo ankizy tanora no lasibatra amin’ny fidorohana rongony. Misy amin’ireo àry manisy menaka rongony amin’ny sigara fohany. Feno baorika sigara misy rongony avokoa eny amin’ny tsena rehetra eny. Ary tsy zakan’ny saina izany ka mahatonga ny tsy fandriam-pahalemana eny Ampitatafika », hoy ny ben’ny tanàna. Manoloana izany anefa dia mbola tsy misy mihitsy ny fiaraha-miasa amin’ireo mpitandro filaminana fa miasa irery ny kaominina hatramin’izao, hoy hatrany ny fanazavana.