Antananarivo indray no nampiantrano ny atrikasa fampiofanana nokarakarain’ny Cnaps, taorian’i Betroka. Ventin-kevitra tamin’izany ny fahalalana momba ny adidin’ny mpampiasa sy ny zon’ny mpiasa. Notsiahivina nandritra ny atrikasa fa maro ny asa sahanin’ny tahirim-bolam-panjakana. Isan’izany ny fitantanana ny latsakemboky ny mpampiasa sy ny mpiasa ho lasa fanampiana ara-tsosialy, ny fanaraha-maso ny didy aman-dalàna ary ny fampiofanana fanentanana ny rehetra fa zo fototra ny fananana fiahiana ara-tsosialy.

« Mampalahelo tokoa ny mahita ny olona very zo rehefa antitra vao taitra fa tsy mandray fisotroan-dronono. Fony mbola tanora anefa tsy niraika ny hanara-maso sy hijery na voaloa na tsia ny latsakemboka» hoy Rémi Henri Botoudi, Filohan’ny filan-kevim-pitantanan’ny Cnaps. Koa nentaniny ny mpiasa hitaky ny zony dieny izao am-perin’asa izao. Namporisihiny ihany koa ny mpampiasa mba hiaro ny zon’ny mpiasa. Eo ny fandoavana ny latsakemboka fa nasiany tsindrim-peo ihany koa ny amin’ny fiarovana ny mpiasa amin’ny loza raha am-perin’asa sy ny fahasalamana eo anivon’ny orinasa. Ny mpiasa salama sy milamin-tsaina no afaka mamokatra sy manodina ny orinasa.