Roalahy vao erotrerony no tra-tehaka nangalatra môtô teny Ivato. Niharan’ny fitsaraham-bahoaka izy ireo. Notontain’ny olona tamin’ny vato be ny mason’ ny iray tamin’izy ireo ka goaka be mihitsy sady torana tsy nahatsiaro tena.

Vaky be ny loha, nizihitra sady nibontsina. Nivoa-dra ny sofina sy ny orona ary ny maso izay hifotra tanteraka satria notontain’ny olona tamin’ny vato be. Nalemy tsy afa-nitsangana tao anaty minitra vitsy ireo lehilahy miisa 2 tratra nangalatra môtô, teny Ivato, ny alin’ny alatsinainin’ny paska lasa teo. Niharan’ny fitsaraham-bahoaka izy roalahy ireo ary nanamparan’ny fokonolona teny an-toerana ny fahatezerany. Vy, hazo ary vato be no namelezan’ny mponina azy ireo ka raparapa mihitsy ny tarehy. Ny iray izay goaka mihitsy ny masony rehefa notontain’ny olona ny vato be ary torana tsy nahatsiaro tena avy eo.

Saika ratsy fiafara ireto mpangalatra ireto raha tsy nisy zandary nahita, araka ny loharanom-baovao. Niezaka nanakana ny fahatezeran’ireo fokonolona ireo ny mpitandro filaminana ka nanavotra ireo jiolahy ary nitondra azy ireo teny amin’ny hopitaly Hjra.

Laurena Nany