Tratra  ilay jiolahy raindahiny ikoizan’ny fokonolona amin’ny famakiana trano, ny alakamisy lasa teo, tokony ho tamin’ny 5ora tany ho any, tao Manjarisoa any Mahajanga. Nokarohin’ny mpitandro filaminana efa amam-bolana maromaro izy manoloana ny vaky trano nifanesy tany an-toerana ka izao saron’ny fokonolona izao ihany. Tsy namelan’izy ireo mihitsy ilay jiolahy fa nifandroritana avy amin’ny fokontany Aranta ka tsy tratra raha tsy tany Manjarasoa rehefa niditra an-keriny tao an-tokantranon’ny olon-tsotra nikasa hiafina. Noraisim-potsiny, noho izany ilay mpamaky trano.

Nisy anefa ireo nampandre ny mpitandro filaminana teo anelanelan’izay fifanjevoana izay ka fotoana fohy ihany dia nigadona teny an-toerana izy ireo nisambotra ilay olon-dratsy.  Tamin’ny fanadihadiana natao azy no nilazany fa ao anaty tambajotra mpamaky trano ny tenany ary efa maro ireo toeram-ponenana no lasibatr’izy ireo. Eo am-pelantananan’ny mpitandro filaminana ny raharaha ary efa mandeha ny fikarohana ireo namany.

L.N