“Ny olombelona mandalo, ny tantara tsy fanadino, Tiavo ny Tanindrazanao, arovy sy vimbino”, io no hafatr’ireo Bekotromaroholatra, any Mahajanga nandritra ny fankalazana ny faha-69 taona nitsingerenan’ny tolom-panafahana 29 martsa 1947, tany amin’ny renivohitr’i Boeny, ny talata lasa teo.

Tsy nitsitsy aina ireo mpitolona mba hananan’ny taranak’izy ireo ny fahaleovantena. Ankehitriny anefa toa tsy misy vidiny ny rà latsaka tamin’izany raha mandinika  ny manjo ny firenena sy ny vahoaka Malagasy izy ireo.  Araka ny fitantaran’ireo vavolombelona telo sisa, any Mahajanga, izay anisan’ireo niaina ny ady tamin’izany fotoana izany.

“Na ny fampanajana sy ny fanatrehana ny lanonan’ny 29 martsa fotsiny aza dia tsy maro amintsika Malagasy ankehitriny no manao izany. Ireo olom-panjakana sy miaramila ihany no tonga maro manatontosa izany isan-taona, ankoatra ireo mpino vitsivitsy, sy ireo be antitra. Tsy misy akory ezaka na dia kely aza,  avy eny anivon’ny fokontany, na seha-panabezana isan-tsokajiny mampiditra sy mandetika anatin’ny sain’ny ankizy sy ny tanora ny maha sarobidy amintsika io daty io satria vaky lay ny Fahafahana, ary rà sy aina Malagasy latsaka no vidiny”, hoy ireo Bekotromaroholatra.

Nangonin’I L.N