Maty nianjeran’ny trano ireo zazakely roa, 5 taona sy 3 taona ny alakamisy lasa teo, teny amin’ny fiantsonan’ny fiara, tany Alakamisin’ Ambositra. Trano fisakafoanana iray an-dalam-panondrotana amin’ny rihana faharoa no nahatonga ny loza. Teo am-panamboarana indrindra ireo mpandrafitra no nirodana tampoka ny ilany avaratra ka nianjera niaraka tamin’izay ireo mpiasa telo lahy, izay naratra mafy avokoa. voatsindrin’izy ireo tao ireo ankizy kely nilalao teo ambany ary tsy nisy azo natao azy ireo intsony. Ny iray maty teo no ho eo raha toa ka nindaosin’ny fahafatesana tany amin’ny hopitaly ny faharoa. Nianjeran’ny vy sy “beton” no nahafaty azy ireo. Potika tsy nisy noraisina ihany koa ireo fiara roa nijanona teo izay nianjeran’ny vy sy béton ihany koa. Ny iray nameno mpandeha ho any Soavina. Naratra avokoa ireo olona tao anatiny, araka ny loharanom-baovao. Tsy niandry ela fa nidina avy hatrany teny an-toerana nanao ny fizahana ireo tompon’andraikitra raha vao naharay ny vavao. Tsikaritra nandritra izany fa misy ny tsy fanarahan-dalana amin’ny fanamboarana izany trano izany. Mandeha ny fanadihadiana. Ireo marary kosa efa manaraka fitsaboana eny amin’ny hopitaly.

Laurena Nany