Nisehoana lozam-pifamoivoizana mahatsiravina, tany amin’ny distrikan’i Mahambo, ny zoma hariva lasa teo. Fiara 4×4 iray nentina teratany vahiny no nifatratra tamin’ny mini-bus marika Mazda mpitatitra olona, tamin’ny tanàna iray antsoina hoe Ambatomalama, izay 5 km tsy hiditra an’io distrika voalaza ery ambony io.

Nirimorimo mafy ilay nitondra fiara tsy mataho-dalana ka tsy nahatana intsony ny familiana. Mafy ny fifandonana ka namoy ny ainy avy hatrany ny ankizy kely iray tao aorianan’ny mpamily. Nosokirina avy tao anatin’ilay taksiborosy ity farany ary nifamonjena tany amin’ ny hopitaly Fenoarivo Atsinanana saingy tsy tana intsony ny ainy rehefa tonga kelikely tao. Naratra avokoa ireo mpandeha sisa ary nentina namonjy ny hopitaly ihany koa.  Efa eo am-pelatanan’ny mpitandro filaminana kosa ilay teratany vahiny nahavanon-doza.

Olona valo ihany koa no naratra mafy vokatry ny lozam-pifamoivoizana hatrany tany amin’ny lalam-pirenena Rn6. Taksiborosy marika Mercedes Sprinter avy aty an-drenivohitra hihazo an’Antsiranana no nivadika tampoka rehefa hiditra ny  tanàn’Ambanja, ny sabotsy maraina lasa teo.

Laurena Nany