Zava-misy sy mampalahelo ary nanaitra ny trangan-javatra niseho tany amin’ny distrakan’i Toliara. Vehivavy 38 taona, maty vady sady manan-janaka roa no nifidy ny fahafatesana, ny alahady lasa teo, noho ny olana ara-bola. Tamin’ny fahavelon’ny vadiny dia tsy mba nanana olana ara-bola mihitsy ilay vehivavy satria nikarakara tokantrano foana ny tenany hatramin’ny fotoana nahafatesan’iry voalohany, izay maty tampoka. Nanomboka teo dia nanana fahasahiranana ara-bola namelomana ireo zanany ilay renim-pianakaviana satria tsy nanana asa raikitra. Mbola nanampy trotraka etsy andaniny ny hofan-trano isam-bolana. Nitombo isan’andro ny olany. Tonga teo amin’ny faran’ny heriny izy, ary tsy nanana zavatra hafa intsony afa-tsy ny fanaperany ny ainy satria nahazo filazana fandroahana tamin’ny tompon-trano. Nangataka fe-potoana efatra andro ny tenany mba hitadiavana vahaolana saingy tsy nahita mihitsy ka naleony nitelina fanafody. Fatin’ olona nivalampatra sisa no hitan’ny tompon-trano rehefa handeha hitaky ny volany izy.

Laurena Nany