Nitrangana lozam-pifamoivoizana an-dranomasina indray ny fari-dranomasin’i Maroantsetra. Botry iray hihazo ny kaominina Rantabe, tanàna  mipetraka eo amin’ny 40 kilometatra miala ny distrikan’i Maroantsetra no tra-doza tampoka rehefa tonga teny am-povoan-drano. Mpandeha folo mponin’i Rantabe sy enta-madinika ary môtô no nentin’ity mpitatitra olona an-dranomasina ity. Mpandeha miisa 6 no avotra soa aman-tsara fa ny efatra narendriky ny ranomasina. Roa amin’ireo, sefon’ny zandarimaria miaraka amin’ny vadiny avy namonjy ny fankalazana ny andron’ny zandarimaria, tany Maroantsetra.

Nandeha ny fikarohana ka olona iray no voalaza fa efa hita ny vatana mangatsiakany ary telo kosa mbola tadiavina. “Izaho dia mbola tsy nahazo ny fanamarinana mazava mahakasika ity loza an-dranomasina ity fa amin’ny fahafantarako ireo mpanamory botry ireo dia tsy maintsy  andraikitr’izy ireo ihany ny loza tahaka izao. Izy ireo izay tsy mieritreritra ny fiarovana ny mpandeha fa ny vola miditra ihany. Mino aho fa 90 isan-jaton’ny loza tahaka izao dia avy amin’ny vesatra tafahoatra”, hoy ny loharanom-baovao avy any an-toerana. Na izany na tsy izany dia mitohy ny fikarohana ireo telo mbola tsy hita.

Laurena Nany