Nisehoana lozam-pifamoivoizana, tany amin’ny tanàna iray 18 kilometatra tsy hiditra an’i Soanierana Ivongo. Fiara nentin’ny solombavam-bahoakan’izany toerana izany no niharam-boina tampoka rehefa tonga tany amin’ny fokontany Manankatafana, ny marainan’ny alatsinainy lasa teo, tokony ho tamin’ny 5ora, noho ny faharatsian’ny lalana. Avy naka skoto namonjy lasy tany amin’ny kaominina Vohilengo, distrika Fenoarivo-Atsinanana ilay Depiote dia io tra-doza io. Araka ny vaovao voangona dia misy lavaka eo amin’ny lalana manoloana ny hopitaly Manankatafana ka tsy tafala izany ilay fiara ary nifatratra tamin’ny tambohon’ny hopitaly. Vokany, naratra mafy teo amin’ny tongony sy tratrany ilay solombavam-bahoaka ary ao anaty tsy fahasalamana tanteraka ny tenany amin’izao. Skoto iray ihany koa no tapa-tongotra ary dimy hafa naratra saingy tsy misy atahorana ny ain’izy ireo. Misy tamin’ireo naratra no nalefa any amin’ny hopitaly Soanierana Ivongo ; nisy ihany koa ireo nalefa notsaboina any amin’ny hopitaly manara-penitra, any Toamasina, ka anisan’izany ilay olom-boafidy.

L.N