Taorian’ny fikarohana natao dia efa hita avokoa ireo mpandeha telo narendriky ny lakana, tany Maroantsetra. Indrisy anefa fa efa vatana mangatsiakan’izy ireo sisa no nojonoina tao anaty ranomasina. Ny iray hita ny harivan’ny alatsinainy teo, omaly maraina kosa ny roa hafa ka anisan’izany ilay zandary “chef de poste” sy ny vadiny, araka ny loharanom-baovao.

Raha tsiahivina dia lakana iray mampitohy ny distrikan’i Maroantsetra sy ny kaominina Rantabe no rendrika tampoka ny alahady lasa teo, rehefa hihazo ity kaominina ity. Mpandeha folo no tao anatiny ka isan’izany ilay « chef de poste » ny zandarimarian’i Rantabe sy ny vadiny izay avy namonjy ny andron’ny zandarimariam-pirenena. Tsy fantatra mazava ny antony nahatonga ny loza fa ahiana ho ny vesatra loatra nentin’izany lakana izany. Natolotra ny fianakaviany avy ireo razana.

L.N