Ho fanatsarana ny tontolon’ny fanabeazana sy fampianarana dia mpampianatra Fram iray alina indray no horaisina ho mpiasam-panjakana, amin’ity taona 2016 ity, izay tafiditra amin’ny andiany fahatelo. Efa vita daholo ny fanadiovana ny lisitra ankoatran’i Melaky, nohon’ny haratsian-dalana. Amin’io herinandro ambony io no hidina any an-toerana ny ekipan’ny ministeran’ny Fanabeazam-pirenena hamarana  ny fankatoavana ny lisitra. Tsy hisy intsony, noho izany, ny famoahana ny lisitra faharoa. Ny fandraisana ireo mpampianatra maherin’ny 45 sy 50 taona no hampiavaka ity andiany ity. Aorian’ny fandraisana ireto andiany fahatelo ireto dia mpampianatra Fram 50 000 no mbola hampidirana ho mpiasam-panjakana. Raha efa izany, tsy hisy intsony ny mpampianatra Fram tsy ho mpiasam-panjakana, eo anivon’ny Cisco 12 manerana ny Nosy.

“Mpampianatra miisa 87 avy ny kôta an’ireo Cisco manerana ny Nosy. Nidina be ny filana tamin’ny Cisco sasany nefa niakatra kosa ny hafa, taorian’ireo andiany roa miantoana 2014-2015. Vokany, najanona any amin’ny Dren tsirairay avy ny kôta mba hialana amin’ny isa mihoatra any amin’ireo Cisco”, araka ny fanazavana nentin’i Sandrot Rabeandalana, talen’ny mahaolona ao amin’ny ministeran’ny Fanabeazam-pirenena.

Marihina fa ireo 10 000 noraisina ho mpiasam-panjakana ireo dia voafantina teo anatrehan’ireo rehetra liana tamin’izany, ireo manam-pahefahana ary ireo mpandray anjara amin’ny tontolon’ny fanabeazana.

L.N