Nandriaka ny ra, teny Fenoarivo Alakamisy, omaly tokony ho tamin’ny 10 ora maraina, vokatry ny lozam-pifamoivoizana. Fiara telo no nifandona manoloana ny sampanan-dalana mankany Vontovorona. Fandehanan’ny fiara iray marika Mercedes Sprinter mafy loatra nefa niditra fiolanana no nahatonga ny loza. Araka ny loharanom-baovao dia nisy fiara tsy mataho-dalana an’ny tambajotra iray mikirakira momba ny fifandraisan-davitra sy serasera maty tamin’iny lalana iny ka notaritin’ny kamiao kely. Ity farany kosa avy eo no nodomin’ilay Sprinter. Mafy ny fifandonana teo amin’ny telo tonta ka maty tsy tra-drano ilay mpamily ny fiara Sprinter satria voatsindry teo anelanelan’ny familiana ny tratrany. Vehivavy iray nipetraka teo akaikiny ihany koa no naratra mafy, izay tapa-tongotra mihitsy ary voatery nosokirina ny namoahana azy tao anaty fiara, hoy hatrany ny loharanom-baovao. Efa manaraka fitsaboana eny amin’ny hopitaly ny naratra.

Laurena Nany