« Torapasika madio, tontolo an-dranomasina salama ho antsika jiaby », io no lohahevitra nentina nanamarihana ny fanadiovana faobe ny torapasika teny amin’ny Petite plage Amborovy, any Mahajanga, ny 2 aprily lasa teo. Fampihenana ny fako mba tsy hivarina ao anaty ranomasina indray no tanjon’ny fanadiovana, noho izy tena mahasarika ny mpizahantany ho any an-toerana. Nampiavaka ity hetsika ity ny fifanandrifiana tamin’ny famaranana ny fetin’ny haza an-dranomasina natao tany Mahajanga izay tsy afa-misaraka amin’ny torapasika, ary samy ankafizin’ny mpivahiny. Teo ihany koa ny fandraisan’anjara nataon’ireo sampan-draharaha maro isan-tsokajiny na miankina na tsy miankina amin’ny fanjakana tamin’ity fanadiovana faobe ity.

Fetin’ny hazan-dranomasina

Mpisehatra amin’ny asa jono nentim-paharazana sy jono vaventy, trano fisakafoanana antonony sy lehibe, ary foibem-paritra maromaro toy  ny avy ao amin’ny harena anaty rano sy ny jono, ny ao amin’ny fizahantany, ny ao amin’ny tontolo iainana sy ranomasina no niara-nisalahy tamin’ny Faritra Boeny nanatontosa ny  fetin’ny haza an-dranomasina andiany voalohany, izay nanomboka ny 25 marsa ary tsy nifarana raha tsy ny 2 aprily lasa teo. Ho fanamarihana ny fisokafan’ny taom-panjonoana tao Boeny sy ho fampahafantarana ireo karazana hazan-dranomasina hananan’ny faritra ary ny fahaiza-mahandro azy, no antony nanaovana ny hetsika.

Teo ihany koa ny fampahafantarana ireo karazana haza an-dranomasina sy ny tontolon’ny jono an-dranomasina, narahina fanandramana ireo nahandro tamin’ny fomba samihafa, fifanakalozan-kevitra momba ity harena ity sy ny fitrandrahana ary ny fiarovana azy ary ny  fanadiovana torapasika.

Nangonin’i  Laurena Nany