Raha nangingina tato ho ato ny aretina ambalavelona dia nahenoina tranga indray tao amin’ny sekoly Ceg iray any Tananambo, kaominina Fanandrana, distrikan’i Toamasina II. Efa tamin’ny andron’ny sekoly no voalaza fa nahitana azy io saingy izao vao tena mirongatra izany satria mihamaro ny ankizivavy tratrany. « Very hevitra ny ray aman-drenin’ny mpianatra satria miverina mihetsika ilay aretina rehefa tonga any am-pianarana ny ankizy na dia hita izao aza fa salama », hoy ny loharanom-baovao avy any an-toerana. Manaitra ny tompon’andraikitra mahefa ireo mponina any an-toerana, manoloana ity karazan’aretina ity satria tena efa manerana ny Nosy no aharenesana azy. Aiza ny Fanjakana? Mijaly ireo ankizy Malagasy. Toa ny fiangonana hatrany mantsy no vaky loha mitady vahaolana manao fotoam-pivavahana amin’ny fanasitranana ity trangan’aretina ity fa ny Fanjakana, mangatsiatsiaka. Sa tsy valan’aretina tsy ahazoana fanampiana ara-bola avy any ivelany izy io ka tsy raharahiana?

Laurena Nany