Nandravarava ny afo tany amin’ny tsenan’ny tantsaha, tany Mananjary, manakaiky ny tobin-tsolika “Jovenna”, omaly antoandro, tokony ho tamin’ny 1ora tany ho any. Ora roa taty aoriana, tsy voafehy ny afo fa niredareda, nandeha nianavaratra nihazo ireo hotely gasy manodidina. Tsy nisy niraviravy tanana fa nifanampy ireo mponina tamin’ny famonoana ny afo sy namoaka ireo entana mandrapaha-tonga ireo mpamonjy voina. Tamin’ny 5ora hariva tany ho any vao maty tanteraka ny afo. Mafy ny fahavoazana ary tombanana ho an-tapitrisany maro ny teti-bidin’ny zavatra may rehetra tao. Tsy fantatra mazava kosa hatreto ny nahatonga ny fahamaizana satria samy manana ny fahitany ny rehetra, araka ny loharanom-baovao. Ankilany, misy ireo milaza fa fifampikasohan’ny herinaratra no anton’izany. Andaniny, misy ireo miteny fa fipoahan’ny lasantsy  avy eo amin’ny mpivarotra eo amin’ny sisin’ny tsena eo no niantombohan’ny afo saingy  tsy mbola voaporofo kosa ny fahamarinan’izany. Efa misokatra ny fanadihadiana.

Laurena Nany