Jiolahy miisa 2 rain-dahiny amin’ny fanaovana fakana an-keriny sy fanafihana mitam-piadiana no voasambotry ny mpitandro filaminana, tany amin’ny fokontany Ampasimena, kaominina sy distrikan’i Morafenobe, ny talata 26 aprily lasa teo. Izy roalahy ireo izay marihina fa tompon’antoka tamin’ny fanolanana miharo famonoana an’ilay karana vavy, ny faran’ny herinandro lasa teo. Nanapa-kevitra ny zandary fa ho any amin’ny trano fonenan’ireo jiolahy taorian’ny famotorana natao azy ireo, ny alarobia 27 aprily maraina tamin’ny 6ora, mba hanao fisavana. Tafatsoaka teny an-dalana ireo olon-dratsy ka voatery nitifitra ny mpitandro filaminana, araka ny vaovao avy amin’ny zandary. Vokany, maty tsy tra-drano ireo olon-dratsy. Natolotra ny fokonolona ireo razana. Nandray fepetra ihany koa ny ofisie mba hanao fanadihadiana lalina momba io raharaha io.

Raha tsiahivina dia karana vavy iray no hita faty nitsirara tao amin’ny trano fonenany ny alahady lasa teo, tokony ho tamin’ny 1ora maraina, tany ho any. Tamin’ny fizahana natao no nahalalana fa maty nisy nanolana ny tenany satria niboridana tanteraka izy ary silipo sisa no teny ankodiny. Mitohy ny fanadihadiana.

Laurena Nany