Taorian’ny lozam-pifamoivoizana nampihoron-koditra niseho teto an-drenivohitra sy ny manodidina izay nahafatesana olon-dehibe sy ankizy kely maro be, ny zoma lasa teo iny dia mbola nampiteny azy ihany koa ireo taksibe ny faran’ny herinandro lasa teo. Avy any Talatavolonondry hatrany Ampitatafika dia mbola niseho lany ny loza nateraky ny tsy fitandreman’ireo mpamily taksibe. Mpandeha maherin’ny roapolo no fantatra fa naratra mafy hatreto.

Ny sabotsy maraina dia mpivavaka hihazo ny Talatavolonondry no navadiky ny fiara Sprinter, tany Ambohitrabiby. Fandehanana mafy no voalaza fa nahatonga ny loza. Vokany, mpandeha maromaro no naratra ary potika tsy nisy noraisina ilay fiara fitaterana. Toraka izay ihany koa ny nahazo ny taksibe iray, ny alahady maraina vao mangiran-dratsy, teny Malaza Ampitatafika. Ity farany izay nodomin’ny fiara tsy mataho-dalana ary nilatsaka teny an-tanimbary ny lohany. Naratra avokoa ireo mpandeha tao anatiny.

L.N