Miseho lany ny fihoaram-pefy sy ny fanaparam-pahefana ataon’ireo mpitandro filaminana amin’izao fotoana izao. Andrimasom-pokonolona iray no namoy ny ainy, noho ny hetraketrak’ireo miaramilan’ny Das, tany Ankianjandravonjy, fokontany Tranohaolo, Kaominina Ambalanirina, distrikan’i Tsiroanomandidy, ny zoma 29 aprily, tamin’ny 10ora alina. Tsy dia fantatra ny anton’ny famonoana fa nosamborin’ireo miaramila ireo ity mpanao andrimasom-pokonolona ity ny androtr’io, tamin’ny 11ora antoandro. Rehefa tonga tany amin’ny birao izy ireo dia daroka sy vely vody basy no niainan’ilay lehilahy nandritra ny ora maromaro. Herisetra izay nitarika takaitra ary nitondra azy any amin’ny fahafatesana.

Nametraka fitairanana tany amin’ny tompon’andraikitra avy hatrany ny fianakavian’ilay niharam-boina manoloana ity herisetra nahazo ny havany ka nandray ny andraikiny iry voalohany tamin’ny fisamborana ireo nahavanon-doza mba hatao famotorana. Araka ny vaovao avy amin’ny zandary dia kaporaly sy “soldat de 1ère classe”, eny amin’ny R3A Betongolo no tompon’antoka tamin’ity famonoana ity. Misokatra ny fanadihadiana.

Laurena Nany