Tranga iray nampihoron-koditra no hita, tao Laidama, akaikin’i Jean Louis, any Ambilobe, ny 2 may maraina lasa teo. Mpandeha vao maraina tany amin’io faritra io no nahatsikaritra zavatra nihantona teny ambony hazo. Akory ny hatairan’izy ireo fa fatin-dehilahy iray 30 taona any ho any ary voafatotra amin’ny tendany ilay izy. Nantsoina avy hatrany ny tompon’andraikitra teny an-toerana. Rehefa natao ny fizahana dia tsy fantatra mazava izay tena nahazo ity lehilahy ity ary fantatra fa ny alin’ny alahady izy no efa maty.

Raha ny fahitan’ny maro azy dia heverina ho namono tena izy saingy mbola tsy fantatra ny antony. Tsy azo lavina ihany koa anefa ny mety hoe nisy namono ity tovolahy ity ka nahantona teo ny vatana mangatsiakany satria tsy nivoaka ny lelany ary mbola teny amin’ny lohany ny satroka. Na izany aza anefa tsy nahitana ratra na dian-kapoka ny vatany raha ny fampitam-baovao voaray. Efa mandeha ny fanadihadiana.

L.N