Ho famongorana ny tsy fandriam-pahalemana sy ireo atidoha mpikotrika izany dia olona miisa 8 mianadahy no eo am-pelatanan’ny polisim-pirenena, any amin’ny distrikan’i Vavatenina. Vokatry ny fiaraha-miasa amin’ny olona tsara sitra-po no nahafahana nisambotra azy ireo, ny fiandohan’ity herinandro ity. Sarona niaraka tamin’izy ireo ny basy vita gasy miisa 2 sy bala miisa 7 nandritra ny fisamborana.

Izy ireo izay voafaritra fa isan’ireo olon-dratsy nampitondra faisana ireo mponina any an-toerana tamin’ny fanafihana mitam-piadiana niseho tany an-toerana efa an-taonany maro izay fa izao vao sarona. Nandritra ny fanadihadiana natao no nahalalana fa ao anatin’ny tambajotra izy ireo ary samy niaiky ny heloka vitany avokoa. Antenaina, araka izany fa  ho fongana ny tambajotran’ny mpanao ratsy any Vavatenina raha ny  eo amin’ny lafiny  fanafihana mitam-piadiana no resahana.

Hiaina ao anaty filaminana sy hatory milamina ihany koa  ireo mponina any an-toerana amin’izao fotoana izao raha toa ka tao anaty tsy fandriam-pahalemana sy horohoro tanteraka no niainana hatramin’izay. Amin’ity herinandro ity no hiakatra Fitsarana izy valo mianadahy ireo.

Laurena Nany