Miha mahery vaika ny fampihorohoroana ataon’ireo dahalo, any amin’ny faritra Melaky amin’izao fotoana izao. Ny 3 may vao maraina, tamin’ny 5ora mantsy dia mpiandry omby iray no namoy ny ainy ary olona roa hafa kosa naratra mafy vokatry ny fanafihana mitam-piadiana niseho tany amin’ny fokontany Ankinajao, kaominina Bekopaka, distrikan’Antsalova. Dahalo miisa 10 nitondra basim-borona roa sy antsy lava lela no tonga masiaka tao an-toerana tamin’io fotoana io nikasa hangalatra omby tao am-bala. Nirefodrefotra ny feom-basy nandritra ny fanatanterahana ny fanafihana ka naha voatifitra sy nahafaty io mpiandry omby io. Tsy tongan’ireo malaso moa ny omby fa nandositra avy hatrany izy ireo vao nahita ny fatin’ilay lehilahy niampatra teo amin’ny varavaram-bala.

Nampandre ny zandary ireo mponina rehefa lasa lavitra ireo olon-dratsy ka raikitra ny fanarahan-dia niaraka tamin’ny fokonolona.

L.N