Be loatra ny olona amin’izao fotoana izao no tsy mahafehy ny teny Malagasy. Tsikaritra izany eny amin’ny peta-drindrina, fahitalavitra, dokam-barotra, gazety, any am-piangonana, mandritra ny valan-dresaka, eny na ireo mpanoratra aza, indrindra ireo vao misondratra dia tena betsaka ny mandiso tsipelina. Manoloana izany indrindra dia namoaka boky i Lala-Rakotoson Raolisoa Julienne Agnès, mitondra ny lohateny hoe “Fitsipi-panoratana ny teny Malagasy”. Boky niarahany namolavola tamin-dRabenoro Claude ary navoakan’ny trano famoaham-boky Tsipika, ho fanamarihana ny faha-25 taona nitsanganan’izany tranom-pamokarana izany. Boky fianarana natao ho an’ny mpianatra amin’ny ambaratonga rehetra, ny mpampiasa ny teny Malagasy amin’ny haino aman-jery, gazety, revio sy boky izay maniry ny hahafehy ny fanoratana ny teny Malagasy. Tafiditra ao avokoa ny fianarana fanononana sy fanoratana ny teny Malagasy satria mampahafantatra ny toeran’ny tsindrim-peo ao amin’ny teny tsirairay ; manoro ireo karazan-tsirinteny enti-mamorona ireo sokajin-teny isan-karazany ; mampianatra ny fomba fanakambanan-teny sy izay takian’ny fampifandraisana ; mampiseho ny fampiasana mari-potoana ary manitsy ireo teny maro fampiasa sy mahazatra nefa disoina mandrakariva fa indrindra indrindra, mamaha ny olana amin’ny fampiasana ny “h”.

L.N