Nisehoana vono olona nahatsiravina teny amin’ny fokontany Betsitsy kaominina Ambohimangakely. Tamin’ny fomba feno habibiana no nahasahian’ilay tovolahy namono nahafaty ny raikeliny. Teny amin’ny toerana atao hoe Ampanasana no nitrangan’izany, ny alatsinainy lasa teo. Efa ny alin’ny alahady no voalaza fa nisy fifamaliana teo amin’izy mianaka ireo. Ny maraina anefa dia mbola nitohy izany raha nampiseho ny alahelony sy ny zavatra tsy zakany ilay tovolahy ka niafara tamin’ny fifampikasihan-tanana. Nanao tampody fohy naka antsy ilay tovolahy ary notrobarany teo amin’ny fon’ilay raikeliny. Nijininika eran’ny trano ny ra. Niezaka nitondra ny naratra teny amin’ny hopitaly ihany ny akaiky azy saingy tsy tana intsony ny ainy satria nisy lalan-dra tapaka tao amin’ny fony. Araka ny fanazavan’ny havan’ny maty dia niezaka nanasaraka ihany izy ireo fa tsy nahatohitra ny hafanam-pon’ilay nahavanon-doza. Fantatra ihany koa fa nandositra ity farany ary tsy hita izay misy azy hatramin’izao. Nandritra ny fotoana nifamonjena ilay naratra no voalaza fa nanararaotra nitsoaka izy. Eo am-pikarohana azy ny mpitandro filaminana sy ny fianakaviana ankehitriny.

Laurena Nany